यो थकित मन बिसाउने चौतारी छ
र पो जीवनमा उमङ्गको आभास छ
म कतै बजारिँदा धुलो टकटक्याएर
थमथम्याउने तिम्रा दरिला हात छन्
र पो त प्रेरणा र हौसलाको पूर्णता छ
बा,
सायद त्यसैले होला
तिमी एक बलियो मियोझैँ उभिँदा
मैले सफलताका अग्ला-अग्ला पहाड चढ्न सकेको।
तिमी एउटा वृक्ष हौ भने
म उक्त वृक्षको एउटा हाँगा हुँ
तर तिमी त्यो वृक्ष बन्न
कैयौँ पटक थिचिनुपर्यो, दबिनुपर्यो
घाम, पानी र हुरीबाट जोगिनुपर्यो
संघर्षका ठुला-ठुला पहाड चढ्नुपर्यो
म त केवल तिम्रो त्यही संघर्षको उपज हुँ
तिम्रो त्यहीँ कर्मको एउटा सानो छाया हुँ
तिम्रो मार्गनिर्देशनको एउटा प्रतिबिम्ब हुँ।
बा, तिमीले सन्तानका सपनालाई छातीमा टाँसेर
आफ्ना रहर र चाहनालाई शून्यतामा विलय गरेर
सन्तानको खुसीलाई हृदयमा साँच्यौ
सायद यस्तो नहुने हो भने
मेरो अस्तित्व नै हुने थिएन
मेरो सफलताको सपना सागरको छालझैँ टाढा हुने थिए।
मैले जीवनको संघर्ष बुझ्न
तिमीलाई बुझ्नुपर्छ
तिम्रो सहनशीलता, तिम्रो धैर्यता
र अनन्त त्यागका गाथालाई पढ्नुपर्छ।
शब्दले त तिम्रो महत्त्व बखान्न सक्दैनन्
तर बा, तिमी आँट गर्छौ
र पो मलाई हिम्मत आउँछ
तिमी छौ
र पो मेरो प्रेरणा जाग्छ।
त्यसैले बा हुनु भनेको
हिम्मत हुनु हो
हौसला हुनु हो
प्रेरणा जाग्नु हो।
-1746009348.jpg)
