चीनले पनि अमेरिकाले जस्तै केही वस्तुमा भन्सार छुट दिने!

सेतोपाटी

वैशाख १२

अमेरिकाले चीनबाट आयात हुने स्मार्टफोन लगायत इलेक्ट्रोनिक्स सामानहरूमा रेसिप्रोकल (पारस्परिक) भन्सार दर नलगाए जस्तै चीनले पनि केही अमेरिकी उत्पादनमा उच्च भन्सार नलगाउने सम्भावना छ।

अमेरिकी राष्ट्रपति डोनाल्ड ट्रम्पले अप्रिल २ मा सबै देशलाई १० प्रतिशत भन्सार महसुल र प्रतिस्पर्धीहरूलाई उच्च रेसिप्रोकल महसुल लगाउने घोषणा गरेका थिए।

ट्रम्पले ७० वटाभन्दा बढी देशहरूलाई लगाएको पारस्परिक भन्सार भने ९० दिनका लागि रोके। ती देशहरूले अमेरिकी कर नीतिको विरोध नजनाएको, जबाफी भन्सार नलगाएको र छलफलका लागि तयार रहेको देखिएको भन्दै जुलाईको पहिलो सातासम्मका लागि रेसिप्रोकल भन्सार रोके। त्यतिन्जेलका लागि उनले सबै देशलाई विश्वव्यापी १० प्रतिशत भन्सार दर मात्रै लगाए।

चीनलाई लगाएको भन्सार दर भने नरोकेर पटक पटक बढाए। त्यसपछि पटक-पटक अमेरिका र चीनले जबाफी कदम चालेर थप महसुल लगाएका थिए। जसका कारण ट्रम्पको दोस्रो कार्यकालमा चिनियाँ वस्तुमा लगाएको भन्सार महसुल बढेर १४५ प्रतिशत पुगेको थियो। चीनले पनि जबाफमा अमेरिकी उत्पादनमा १२५ प्रतिशत भन्सार महसुल लगाएका थिए।

एप्पल लगायत ठूला कम्पनीहरूलाई धेरै नोक्सानी हुने भएकाले त्यसपछि चीनबाट आयात हुने स्मार्टफोन लगायत इलेक्ट्रोनिक्स सामानहरूमा ट्रम्पले रेसिप्रोकल दर नलगाउने घोषणा गरेका थिए।

सबै अमेरिकी उत्पादनमा १२५ प्रतिशत भन्सार महसुल लगाउँदा चीनलाई पनि घाटा हुने भएकाले चीनले केही वस्तुमा भन्सार छुट दिन लागेको भन्दै स्रोतहरूलाई उद्धृत गर्दै ब्लुमबर्गले लेखेको छ।

स्वास्थ्य उपकरण, इथेन जस्ता औद्योगिक रसायन लगायत केही अमेरिकी उत्पादनमा चीनले भन्सार छुट दिन लागेको हो। त्यस्तै, चिनियाँ एअरलाइन्स कम्पनीहरूले भाडामा लिने विमानहरूमा पनि भन्सार छुट दिने सम्भावना छ।

चीनले आयातकर्तालाई कुन-कुन अमेरिकी वस्तुमा बढेको भन्सार छुट चाहिएको भनेर सूची पठाउन भनेको छ। त्यसपछि आवश्यकतालाई विचार गरेर चीनले भन्सार छुट दिने अपेक्षा गरिएको छ।

सन् २०२४ मा चीनको अमेरिकासँग दुई खर्ब ९५ अर्ब डलरभन्दा बढीको व्यापार फाइदा थियो। त्यसैले तुलनात्मक रूपमा चिनियाँ उत्पादनमा अमेरिका धेरै निर्भर हुनुपर्छ। तर पनि स्वास्थ्य उपकरण अनि औद्योगिक रसायनहरूमा चीन अमेरिकामा निर्भर छ। त्यसैले चीनले केही वस्तुमा भन्सार छुट दिन लागेको मानिन्छ।