सन् २०२७ को आइसिसी पुरुष क्रिकेट विश्वकप छनोटका लागि टोलीहरूबीच सिधै स्थान सुरक्षित गर्ने प्रतिस्पर्धा तीव्र भइरहँदा नेपालले लगातार दुईवटा 'विश्वकप लिग २' त्रिकोणात्मक सिरिजको आयोजना गर्दैछ।
नेपाल आफ्नो विश्वकप २०२७ को यात्राको एक महत्त्वपूर्ण र निर्णायक मोडमा आइपुगेको छ। आगामी आठ खेलको यात्राले नै नेपालको विश्वकप छनोटको भविष्य र सम्भावित बाटो निर्धारण गर्ने देखिन्छ।
त्रिवि मैदानमा नेपाल, ओमान र युएईबीच वैशाख १२ देखि २२ सम्म पहिलो सिरिज हुनेछ। त्यसपछि वैशाख २९ देखि जेठ ८ सम्म नेपाल, स्कटल्यान्ड र अमेरिका अर्को सिरिजमा भिड्ने५न्।
लिग-२ को अंक तालिकाको शीर्ष दुई स्थानमा रहेका अमेरिका (पहिलो) र स्कटल्याण्ड (दोस्रो) सँग प्रतिस्पर्धा गर्नु पर्ने भएको हुँदा नेपालले घरेलु मैदानको फाइदा उठाउन सक्नेछ।
घरेलु मैदानमा हुने यो सिरिज नेपालका लागि विश्वकप छनोटको दौडमा निकै महत्त्वपूर्ण हुनेछ। यहाँको प्रदर्शन खराब भएमा छनोट प्रक्रिया थप जटिल बन्नेछ।
विश्वकप २०२७ को दौडमा लिग २ को भूमिका?
यस प्रतियोगितामा कूल २४ वटा त्रिकोणात्मक सिरिज हुनेछन्, जसमा सहभागी ८ टोलीले ३६ वटा एकदिवसीय अन्तर्राष्ट्रिय (खेल खेल्नेछन्। प्रतियोगिताको अन्त्यमा शीर्ष चारमा रहने टोलीहरू सिधै 'विश्वकप छनोट' मा पुग्नेछन्, जुन सन् २०२७ को मुख्य विश्वकपमा पुग्ने अन्तिम खुड्किलो हो।
पुछारका चार स्थानमा रहने टोलीहरूको विश्वकप सपना भने सकिने छैन, तर उनीहरूले थप एउटा खुड्किलो पार गर्नुपर्नेछ, जसलाई 'विश्वकप छनोट प्ले–अफ' भनिन्छ। यो एक किसिमको पुनरागमनको अवसर प्रतियोगिता हो, जहाँ लिग २ का पुछारका ४ टोली र च्यालेन्ज लिग (एकदिवसीय क्रिकेटको तेस्रो श्रेणी) का शीर्ष ४ टोलीबीच प्रतिस्पर्धा हुनेछ।
वर्तमान लिग २ चक्रको दुई–तिहाइ खेलहरू सकिँदा छनोटका लागि प्रतिस्पर्धा गरिरहेका ८ टोलीको अवस्था यस्तो छ:
१. अमेरिका: २४ खेल, ३६ अंक (१८ जित, ६ हार)
सन् २०२५ को अन्त्यतिर युएई भ्रमणमा अपराजित रहेको अमेरिका नेपालमा पनि त्यही लय कायम राख्न चाहन्छ। अमेरिकाका लागि प्रशिक्षक पुबुदु दसानायकेको पुनरागमन सुखद रहेको छ। स्पिन अट्याक र कन्डिसनअनुसार घुलमिल हुने ब्याटिङ लाइनअपका कारण उनीहरु सुस्त पिचमा उत्कृष्ट देखिएका छन्।
विशेषगरी मिलिन्द कुमारले ब्याटिङमा आफ्नो स्तर देखाएका छन्। पछिल्ला खेलहरूमा उनले ७०*, ७१, ७० र १२३* रन बनाउँदै आफ्नो एकदिवसीय ब्याटिङ औसत ६७.७३ पुर्याएका छन्, जुन कम्तीमा २० इनिङ्स खेल्ने ब्याटरको हकमा विश्वकै उच्च रेकर्ड हो। उनले साई मुक्कामाल्ला (१३७*) सँग मिलेर २६४ रनको अविजित साझेदारी समेत गरेका थिए। ब्याटिङमा मिलिन्द कुमार (१०१६ रन), मुक्कामाल्ला (८७४) र मोनाङ्क पटेल (८४२) शीर्ष ५ स्कोरर भित्र छन्। बलिङमा सौरभ नेत्रावलकर (३५ विकेट) १०० एकदिवसीय विकेट लिने पहिलो अमेरिकी बनेका छन्।
२. स्कटल्याण्ड: २८ खेल, ३४ अंक (१४ जित, ८ हार, ६ नतिजाविहीन)
खराब मौसमले स्कटल्याण्डको पिछा छोडेको छैन जसका कारण नामिबिया भ्रमणमा उनीहरूले अंक गुमाए। तर, ब्रान्डन म्याकुलनको पाँचौं एकदिवसीय शतकको मद्दतले उनीहरूले नामिबियालाई हराउँदै भ्रमण अन्त्य गरे। जर्ज मुन्से १०४९ रनका साथ सर्वाधिक रन बनाउनेको सूचीमा शीर्ष स्थानमा छन्।
स्कटल्याण्डसँग जुनसुकै टोलीलाई पराजित गर्न सक्ने क्षमता छ। उनीहरूले नेदरल्याण्ड्सविरुद्ध ३८०/९ को विशाल योगफल बनाएका थिए, जुन यस प्रतियोगिताकै उच्च हो। बलिङमा चार्ली क्यासेलले डेब्यु खेलमै २१ रन दिएर ७ विकेट लिँदै कागिसो रबाडाको ९ वर्ष पुरानो विश्व कीर्तिमान तोडेका थिए।
३. ओमान: २४ खेल, २९ अंक (१३ जित, ८ हार, ३ नतिजाविहीन)
नामिबिया भ्रमणमा दुई जित र एक नतिजाविहीन खेलका साथ ओमान अहिले नेदरल्याण्ड्सलाई उछिनेर तेस्रो स्थानमा उक्लिएको छ। अकिब इलियास र जीशान मक्सुद जस्ता मुख्य खेलाडीहरू बाहिरिएपछि कमजोर देखिएको ओमानले पछिल्लो १२ महिनामा उत्कृष्ट पुनरागमन गरेको छ। बायाँहाते स्पिनर शकिल अहमदले १२.५८ को लोभलाग्दो औसतमा ४३ विकेट लिँदै ओमानको बलिङको नेतृत्व गरिरहेका छन्।
४. नेदरल्याण्ड्स: २४ खेल, २८ अंक (१३ जित, ९ हार, २ नतिजाविहीन)
यो लिग २ को नयाँ संरचनामा नेदरल्याण्ड्सको पहिलो सहभागिता हो। सुरुवाती चरणमा निकै बलियो देखिए पनि पछिल्लो स्कटल्याण्ड भ्रमणमा एक खेल मात्र जितेपछि उनीहरू केही दबाबमा छन्। म्याक्स ओ'डाउडले ८५७ रन बनाउँदै ब्याटिङमा निरन्तरता दिएका छन्, जसमा स्कटल्याण्डविरुद्धको १५८* रनको इनिङ्स स्मरणीय छ। बलिङमा काइल क्लेन (३५ विकेट) र पल भ्यान मिकरेन (३४ विकेट) ले टोलीलाई सम्हालेका छन्।
५. नामिबिया: २८ खेल, २२ अंक (१० जित, १६ हार, २ नतिजाविहीन)
नामिबिया अहिले शीर्ष चारभन्दा ६ अंकले पछि छ। सुरुवाती २० खेलमा मात्र ७ जित निकालेको नामिबियाले सुधारका लागि जेजे स्मिटलाई नयाँ कप्तान नियुक्त गरेको छ। बलिङमा बर्नार्ड शोल्ट्ज ४५ विकेटका साथ प्रतियोगिताकै सर्वाधिक विकेट लिने खेलाडी हुन्। नामिबियाको मुख्य समस्या ब्याटिङमा देखिएको छ, जहाँ उनीहरूले आफ्नो स्तर सुधार्नुपर्नेछ।
६. क्यानडा: २४ खेल, २१ अंक (९ जित, १२ हार, ३ नतिजाविहीन)
क्यानडा अहिले तालिकाको छैटौं स्थानमा छ। सन् २०२५ मा उनीहरूको एकदिवसीय फर्म निकै कमजोर रह्यो। ब्याटिङमा हर्ष ठाकर (६३७) र परगत सिंह (६६०) बाहेक अरूले ५०० रन कटाउन सकेका छैनन्। बलिङमा डेलन हेलिगर र कलिम सानाले राम्रो गरिरहेका छन्, तर स्पिन विभागमा साद बिन जाफरबाट टोलीले थप सुधारको अपेक्षा गरेको छ।
७. नेपाल: २० खेल, १२ अंक (५ जित, १३ हार, २ नतिजाविहीन)
नेपालका लागि आगामी दुई सिरिज 'अहिले नभए कहिल्यै हुँदैन' को अवस्था हो। नेपालका लागि प्रेरणाको स्रोत अघिल्लो लिग-२ हुन सक्छ, जहाँ अन्तिम १२ मध्ये ११ खेल जित्दै नेपालले शीर्ष तीनमा स्थान बनाएको थियो। घरेलु मैदानमा हुने आगामी दुई सिरिजबाट नेपालले १६ अंक बटुल्ने अवसर पाएको छ।
ब्याटिङ र बलिङ दुवैमा अहिले कुनै पनि नेपाली खेलाडी शीर्ष १५ को सूचीमा छैनन्। तर, संकटको साथीका रूपमा चिनिने करण केसीले स्कटल्याण्ड भ्रमणमा टोलीलाई हारबाट बचाएर एक सनसनीपूर्ण जित दिलाएका थिए। नेपालले अब आफ्नो ५० ओभरको क्रिकेटमा लय समात्नुपर्नेछ।
८. युएई: २० खेल, १० अंक (५ जित, १५ हार)
युएई अहिले अंक तालिकाको पुछारमा छ। टोलीमा लगातार खेलाडी परिवर्तन भइरहँदा उनीहरूले स्थिरता पाउन सकेका छैनन् (२९ खेलमा २९ फरक खेलाडी)। तर, राहुल चोपडाको ब्याटिङ र स्पिनर सिमरनजित सिंहको उदयले उनीहरूमा केही आशा जगाएको छ। उनीहरूले हालै टी–२० क्रिकेटमा बंगलादेश जस्तो पूर्ण सदस्य राष्ट्रलाई हराएको हुनाले त्यो आत्मविश्वास यहाँ पनि प्रयोग गर्न चाहन्छन्।
-1746009348.jpg)
