गुड फ्राइडे सिनेमा
माटाको सामग्री बनाउने गणेश आफ्नी पत्नी कुर्जा र एक मात्र छोरा लक्ष्मणसँग बस्छन्।
धेरै महत्वकांक्षा नभएका सोझा र इमानदार यो दम्पतीका लागि छोराको गौना गराएर बुहारी भित्र्याउनुबाहेक अर्को ठूलो सपना हुँदैन।
एक दिन अचानक गाउँका धनी व्यक्ति आफ्नो छोरा जन्मेको खबर लिएर उनीहरूको घर आउँछन्। यही खुसीमा बस्ती नभएको निर्जन ठाउँमा धर्मशाला खोलेर पुण्य कमाउने चाहना बाँड्छन्।
यस कामका लागि आफू उनीहरूको घर आएको भन्दै गणेशसँग आफूलाई सहयोग गर्न आग्रह गर्छन्। अनि परिवारसहित उनलाई त्यहीँ बसोबासको बन्दोबस्त मिलाइदिने प्रस्ताव गर्छन्।
घरबाट टाढा जान मन नहुँदा नहुँदै पनि पुण्य कमाउने कामका लागि गरिएको आग्रह गणेश र कुर्जाले नकार्न सक्दैनन्। यो धर्मशाला छोटो समयमै टाढाबाट थाकेर आएका वा बिरामी परेका यात्रुका लागि उपयोगी बास काट्ने ठाउँ बन्छ।
गणेश र कुर्जालाई पनि यसले सन्तोष दिएको हुन्छ।
थरीथरी उद्देश्यले यात्रामा निस्केका मानिसले बास बस्न आउने यो ठाउँमा अक्सर व्यापारीहरूले रात काट्छन्।
धर्मशालामा बास बस्ने क्रममा एक जोडी वृद्ध दम्पतीले गणेश र कुर्जाका छोरा लक्ष्मणको हात हेरेर उनले व्यापारमा सफलता पाउने योग रहेको बताउँछन्।
त्यो वृद्ध दम्पतीले त्यही योग देखेर लक्ष्मणलाई आफूसँगै साझेदार बनाएर व्यापारी बनाउन देशावर लैजाने चाहना पोख्छ। एक मात्र सन्तानका बुबाआमाका लागि त्यो प्रस्ताव सजिलै मान्य हुने कुरै आएन।
गणेश र कुर्जालाई यो प्रस्ताव सुरूमा मन पर्दैन। तर गरिबीमा बाँचेका उनीहरूले धन कमाएर छोराले बंगला, गरगहना जोड्ने र आफूले पनि धनीसरह सुविधापूर्वक बाँचेको कल्पिन थाल्छन्।
ती वृद्ध दम्पतीले देखाएको सपनाले उनीहरूलाई लोभ्याएरै छोड्छ। उनीहरू मन मिचेर छोरालाई अपरिचित मान्छेको हातमा सुम्पिन्छन् र धनी बन्ने दिन कुर्छन्।
तर प्रतीक्षा दुई–चार महिनाको भए पो!
अनिश्चित प्रतीक्षामा बसेका उनीहरूलाई धर्मशालाको काम र त्यहाँ आउने अतिथिले मन भुलाउने काम गर्छ।
धर्मशालामा अक्सर महँगा र आकर्षक गरगहना लगाएका, सम्पन्न मानिस आउनेजाने हुन्छन्। तिनलाई देख्ने भेट्ने क्रममा थाहै नपाई गणेश र कुर्जाको मन लोभिइसकेको हुन्छ।
धन–सम्पत्तिप्रति उनीहरूको लालसा यति तीव्र हुँदै जान्छ कि उनीहरू त्यहाँ रात बिताउन आएका नवविवाहित जोडीको हत्या गर्ने निर्णयमा पुग्छन्।
धनको लोभ न हो। उनीहरूको लालसा बढ्दै जान्छ। पूण्य कमाउने कामका लागि धर्मशाला सञ्चालनमा योगदान दिइरहेका उनीहरू पापको संसारमा प्रवेश गर्छन्।
के उनीहरू यो संसारबाट उम्केलान्?
यसका लागि राजस्थानी स्वादको फिल्म 'परिणती' हेर्नुहोला। यो राजस्थानी लोककथामा बनेको सिनेमा हो।
-1746009348.jpg)
